SOPHOCLES

I.

SOPHOCLES

Poeta Tragicus, patriâ Atheniensis, tantâ orationis suavitate, ut vulgo μέλιττα, h. e. apis, item Siren Attica cognominaretur, aequalis Euripidis ac Periclis, cuius etiam quandoque collega fuit in praetura. Natus Olympiade 73. ante Socratem ann. 17. Ingeniô et fortitudine inclitus, cum Pericle, Dux copiarum fuit. Primus 3. actoribus usus est, adiectô eô, qui vocatur Tritagonista, h. e. tertiarum et ultimarum partium histrio. Primus etiam choros ex iuvenibus 15. introduxit, cum antea 12. tantum introducerentur. Primus quoque tragicas contentiones et compositiones instituit. Scripsit etiam Elegiam, et Paeanas, atque orationem prosam, cum de Choro adversus Thespim et Choerilum contenderet: Tragoediam ad perfectionem perduxit; Stylus eius politicum sapit, et fictiones admodum iudiciosae sunt. Obiit autem 6. an. post Euripidis mortem, cui styli magnitudine praefertur, licet eius sententiis inferio. Filios habuit, Iophontem, Leosthenem, Aristonem, Stephanum, Meneclidem, quorum unus patre iam grandaevô, annos enim 85. attigisse dicitur, Iudices adiit, rogatum, ut Patri Curatorem constituerent: sed hôc partem Oedipi, quam tum forte pangebat, coram Iodicibus recitante, cum ignominia remissus est. exhibuit fabulas 123. quamquam alii dicant multo plures. Victorias autem 23. reportavit, quarum postrema cum praeter spem illi contigisset, repentinô gaudiô dicitur exspirâsse, ut est auctor Val. Max. l. 9. c. 12. ext. Lucian. autem granô uvae strangulatum eum prodidit, quod et Sotadis versiculus apud Stobaeum confirmat,

Σοφοκλῆς ῤᾶγα φαγὼν ςταφυλῆς πνιγεὶς τέθνηκε.

Vide Plin. l. 7. c. 29. Lil. Girald. Dial. de Poet. Fabrum vita Poet. Gr. etc. Hinc Sophocleus. Cicer. l. 16. Famil. Ep. 18. An. pangis aliquid Sophocleum? h. e. grande, grave, et tale quale Sophocles? Virg. Ecl. 8. v. 10.

Sola Sophocleo tua carmina digna cothurno.

Unde Martialis l. 5. Epigr. 31. v. 1.

Varro Sophocleo non inficiande cothurno.

Idem l. 3. Epigr. 20. v. 7.

An in cothurnis horridus Sophocleis.

Iuvenal. Sat. 6. v. 636.

Grande Sophocleô carmen bacchamur hiatu.

Vide Graecum epigramma 3. Anthol. de sepulchro Sophoclis, ubi Opsopaeus notat praestantiam eius, supra Aeschylum, et Euripidem. Nic. Lloyd. Eius sepulchro Electram aut Antigonem insculptam olim legimus, quod inter illius tragoedias principatum facile obtinerent; et quidem Bacchi statua inibi sculpta manu personam seu larvam κουρίμου παρθένου, tragicae virginis, quâ alterutra harum denotabatur, sustinebat. Qua de re vide elegantissimum in Anthologia Dioscoridis Epigramma, partim ex ingenio, partim ex vetusti codicis auctoritate, emendatum a Salmasio ad Vopisc. in Carino, c. 19. quem vide quoque ad Solin. p. 825. Alias et appellative vox usurpata est, ut mox dicemus.

II.

SOPHOCLES

dux Lacedaemonioru, A. M. 3193. Item Grammaticus quidam, interpres Lycophronis et aliorum poetarum.

III.

SOPHOCLES

vide Sophos.